گمشدہ گڑیا

تحریر:روبینہ شاہین

برلن کی ایک خوبصورت دوپہر، جب ہوا میں ہلکی ہلکی خوشبو رچی بسی تھی، ایک ادیب گزرنے والے لوگوں کی بھیڑ میں تنہا کھڑا تھا۔ وہ فرانز کافکا تھا، ایک ایسی شخصیت جس کی زندگی خود ایک کہانی کی مانند تھی۔ اُس دن، اس کی نگاہیں ایک چھوٹی بچی پر پڑیں، جو پارک کے کونے میں اکیلی بیٹھی تھی، اس کی آنکھوں میں آنسو اور چہرے پر اداسی تھی۔

کافکا اس کی طرف بڑھا اور پوچھا، “بیٹی، تم کیوں رو رہی ہو؟”

بچی نے سسکیاں لیتے ہوئے کہا، “میری گڑیا کھو گئی ہے، یہ میری سب سے پسندیدہ گڑیا تھی۔”

کافکا نے اس کی بات سنی اور اس کے دل میں ہمدردی جاگی۔ “فکر مت کرو، ہم اسے ڈھونڈیں گے۔ کل یہاں آنا، میں تمہارے ساتھ مل کر اسے ڈھونڈوں گا۔”

اگلے دن، کافکا پارک میں واپس آیا، لیکن گڑیا کو ڈھونڈنے میں ناکام رہا۔ اُس وقت، اس نے بچی کو ایک خط دیا، جو اس کی گڑیا کی طرف سے لکھا گیا تھا۔ خط میں لکھا تھا:

“پیاری دوست، رو مت! میں دنیا گھومنے جا چکی ہوں۔ میں تمھیں اپنے حیرت انگیز سفر کے بارے میں بتاتی رہوں گی۔”

بچی کی آنکھوں میں چمک واپس آ گئی۔ وہ خط پڑھتے ہوئے مسکرائی اور اس کا دل خوشی سے جھوم اٹھا۔ اس کے بعد، کافکا نے گڑیا کی طرف سے لکھے ہوئے مزید خطوط لکھنے کا سلسلہ شروع کر دیا۔ ہر خط میں ایک نئی کہانی ہوتی، نئی جگہوں کی تفصیلات، حیرت انگیز مناظر، اور ایسی باتیں جو بچی کو اپنی گڑیا کے ساتھ مہم جوئی کا احساس دلاتی تھیں۔

دن گزرتے گئے، اور کافکا اور بچی کی دوستی گہری ہوتی گئی۔ ایک دن، کافکا نے فیصلہ کیا کہ وہ بچی کے لیے ایک نئی گڑیا لائے گا۔ جب وہ بچی کو نئ گڑیا دی تو بچی نے حیرت سے کہا، “لیکن یہ تو میری گڑیا جیسی نہیں لگتی!”

کافکا نے مسکرا کر کہا، “یہی تو ہے، اس گڑیا نے دنیا کے سفر سے بہت کچھ سیکھا ہے۔”

بچی نے گڑیا کو گلے سے لگایا اور خوشی سے بھرپور دل کے ساتھ اپنے گھر لے گئی۔ یہ لمحہ ایک خاص یادگار لمحہ بن گیا، جہاں کافکا نے ایک بچی کے دل کو خوشی سے بھر دیا۔

کچھ وقت گزرا اور پھر ایک دن، کافکا کی زندگی کی روشنی مدھم ہو گئی۔ ایک سال بعد، وہ دنیا سے رخصت ہوگیا۔ کئی سال بعد، جب وہ بچی جوان ہوئی، تو اس نے اپنی پرانی گڑیا کو کھولا۔ اچانک، اس کے اندر سے ایک خط نکلا، جو فرانز کافکا کا تھا۔

خط پر لکھا تھا:

“ہر وہ چیز جس سے تم محبت کرتی ہو، ایک دن گم ہو جائے گی، لیکن بالآخر تمھیں کسی اور شکل و صورت میں ہی سہی، لیکن محبت ضرور ملے گی۔”

یہ خط بچی کے دل کو چھو گیا۔ وہ جانتی تھی کہ کافکا کی محبت اور خیال ہمیشہ اس کے ساتھ رہیں گے، چاہے وہ گڑیا کی شکل میں ہو یا کسی اور۔

…………….