آستین کا سانپ 3
قسط وار کہانی
از قلم ساجدہ بتول
قسط 3
بادشاہ سلامت کی ہیروں والی تھیلی کیا گم ہوٸی ، ابرار کی مشکل از خود آسان ہو گٸی ۔ وہ تو چاہتا ہی یہی تھا کہ جب کبھی بادشاہ سلامت کی کوٸی چیز چوری ہو ، وہ سانپ کو چور کی پہچان کا ماہر بتا کر آصف کو ختم کروا دے ۔
انہی خیالات میں غلطاں وہ دربار میں جا پہنچا ۔ اس کی امید کے عین مطابق آصف بادشاہ سلامت کے اونچے سے تخت کے قریب لگی کرسی پہ بیٹھا تھا ۔
ابرار کو کچھ معلوم نہ تھا کہ کچھ دیر بعد اسی کے ساتھ ایک بھیانک قصہ ہونے کو ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حسد اور محبت کے تانے بانے بنتا ابرار پٹاری اٹھاٸے بادشاہ سلامت کے قریب آ پہنچا ۔ ان کے قریب ہی کرسی پہ آصف بیٹھا تھا ۔
یہ دیکھ کر ابرار کی حیرت کی انتہا نہ رہی کہ بادشاہ سلامت کے ہاتھ میں ایک ننگی تلوار تھی ۔ نجانے کس لیے ؟؟
”ہوں! بیٹھ جاٶ ، تو تم وہ چیز لے آٸے ہو ؟ جس کا تم نے کہا تھا! “
”جی ہاں بادشاہ سلامت! میں نے آپ کو بتایا تھا کہ میرا سانپ چور کو پہچان کر اس کو ڈس لیتا ہے ۔ “
”تو نکالو پھر اسے ۔۔ اگرچہ ہم نے کہا تھا ، چور گھنٹی بجنے سے پہلے اندر داخل نہ ہو ۔ مگر کیا معلوم ، وہ دربار میں پہلے سے موجود ہو ۔ لہٰذہ تجربہ کر لینے میں کوٸی حرج نہیں ۔ “
ابرار نے احتیاط سے پٹاری کھولی ، سانپ کو پکڑ کر باہر نکالا اور پھر منہ سے آواز نکالی ”شش“
سانپ نے آنکھیں گھماٸیں ، پھر پھن پھیلایا ، اور پھر وہ ہو گیا جو کسی کے وہم و گمان میں بھی نہ تھا!!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سانپ پھنکارتے ہوٸے ابرار کی طرف بڑھا تھا ۔
”ارے ارے! بچاٶ ۔۔۔۔۔۔۔ سس سانپ! میرے پیارے سانپ! یہ کیا کرنے لگے ہو ؟ “
حیرت اور صدمے کی ملی جلی کیفیت میں وہ اپنا بچاٶ کرنے کو پیچھے ہٹا تھا مگر سانپ اُسی کی طرف بڑھ رہا تھا ۔
پورے دربار میں سناٹا چھا چکا تھا ۔ سب درباری ششدر تھے ۔ پہلے بادشاہ سلامت کا عجیب اعلان ، پھر ان کے ہاتھ میں تلوار اور اب سانپ کا اپنے ہی مالک کی طرف اسے ڈسنے کی غرض سے بڑھنا ، کچھ سمجھ میں نہ آ رہا تھا ۔
”چھناک!“ اس آواز کے ساتھ ہی سانپ کی گردن دھڑ سے جُدا ہو گٸی ۔ اب سانپ کی گردن اور اس کا دھڑ الگ الگ داٸروں میں تیزی سے گھوم رہے تھے ۔ بادشاہ سلامت نے خون میں لتھڑی تلوار پیچھے کھینچ لی تھی ۔ کچھ لمحوں کے بعد بادشاہ سلامت نے دو تین وار اور کیے جن سے سانپ ٹھنڈا پڑ گیا ۔
”فرش کو صاف کیا جاٸے ۔“ ان کے حکم پہ ایک درباری اٹھا اور تیزی سے باہر نکل گیا ۔ کچھ دیر بعد وہ پانی کی بالٹی اٹھاٸے نوکر کو لیے اندر داخل ہوا ۔
نوکر آتے ہی فرش کو پانی اور جھاڑو سے دھونے لگا ۔ ادھر ابرار کا چہرہ دھواں دھواں ہو رہا تھا ۔ سانپ نے تو آنکھ اٹھا کے بھی آصف کو نہ دیکھا تھا ۔ آج اس کے اندازے غلط ثابت ہو گٸے تھے
۔ گویا آصف کو بادشاہ سلامت سے کوٸی خاص محبت نہ تھی بلکہ ابرار کو ہی زیادہ محبت تھی ۔۔۔۔ مگر وہ بھری بزم میں چور ثابت ہو گیا تھا ۔ ندامت کے مارے اس کا جی چاہ رہا تھا ، یہاں سے بھاگ نکلے ۔ مگر وہ جانتا نہیں تھا کہ ابھی بہت سے حساب اس کے ذمے باقی ہیں جن کو چکاٸے بغیر وہ یہاں سے جا نہیں سکے گا ۔
اسے سانپ کے مرنے کا صدمہ بھی بہت ہو رہا تھا ۔ اس کی پانچ سال کی محنت ایک جھٹکے میں ضایع ہو گٸی تھی ۔ ہاں مگر جان بچ جانے پہ وہ اللہ کا شکر بھی ادا کر رہا تھا ۔ اس کو یہ حیرت بھی تھی کہ بادشاہ سلامت پہلے سے تلوار لے کر کیوں بیٹھے ہُوٸے تھے ؟ کیا وہ چور کو مروانا نہیں چاہتے تھے ؟
ابھی چور کے داخلے کے لیے گھنٹی بجنے کا وقت بھی ہوا چاہتا تھا ۔
کچھ ہی دیر میں فرش دھل گیا اور پھر بادشاہ سلامت نے گھنٹی بجا دی ۔
گھنٹی بجتے ہی دربار کا پردہ سرکا اور ایک شخص اندر داخل ہوا ۔
اس پہ نظر پڑتے ہی سب درباری زور سے اچھلے ۔
(جاری ہے )آستین کا سانپ قسط چار
