دلہن
ساجدہ بتول
ہاتھوں پہ لگی مہندی کی خوشبو اس کی ناک کے ساتھ ساتھ اس کے من کو بھی سیراب کر رہی تھی ۔ سرخ بھاری لہنگے کو سنبھالنا مشکل ہو رہا تھا ۔ اس پہ لگے سنہری موتی اپنی پوری آب و تاب دکھا رہے تھے ۔ ایک ہاتھ میں کانچ کی چوڑیاں اور دوسرے میں سونے کے کنگن اس نے بیوٹیشن کے کہنے پہ پہن لیے ۔ چہرے کا میک اپ پورا ہونے والا تھا آٸی میک اپ چل رہا تھا اسی پہ پورا گھنٹہ لگ گیا تھا وہ بیٹھے بیٹھے تھک گٸی تھی ۔ خدا خدا کر کے آٸی میک اپ پورا ہوا تو نقلی پلکیں بھی لگا دی گٸیں ۔ اب میک اپ کے آٸٹمز میں سے بس لپ اسٹک باقی تھی ۔ ”آپ اب نیکلس پہن لو “
بیوٹیشن نے کہا تو اس نے قریب رکھا سرخ مخملی ڈبہ کھولا اور اس میں سے احتیاط سے سونے کا بھاری نیکلس نکال کے پہن لیا ۔ گلے کے برابر اسے سیٹ کرنے تک اسے کافی سکون مل گیا تھا کیونکہ کچھ حرکت کرنے کو ملی تھی تو تھکاوٹ دور ہو گٸی ورنہ تو اتنی دیر سے سیدھا بیٹھنے سے کمر اکڑ گٸی تھی
”باجی میں دو منٹ کے لیے کھڑی ہو جاوں؟ ، بیٹھے بیٹھے تھک گٸی ہوں“
”دلہن بننا آسان نہیں ہے بنو“ بیوٹیشن نے شرارت سے کہا ”کچھ دیر اور صبر کر لو“
باہر سے تین بار دروازے پہ دستک دے کے پوچھا گیا تھا ، عاٸزہ کے تیار ہونے میں کتنی دیر باقی ہے
بارات آچکی تھی ۔ اس کے خوابوں کا شہزادہ آج جاگتی زندگی میں چل کے اس کی دہلیز پہ آ گیا تھا ۔۔نکاح کل ہو گیا تھا آج بس رخصتی ہونا تھی
اب بیوٹیشن نے اسے سرخ لپ اسٹک لگاٸی ۔ اور آٸینہ اس کے سامنے کیا ۔وہ حیران رہ گٸی ۔ قدرت نے آج اسے جی بھر کے نوازا تھا ۔ٹوٹ کے روپ آیا تھا اس پہ
اپنا ایسا روپ اس نے کب دیکھا تھا! میک اپ تو کجا ، اس نے تو زندگی بھر میں کبھی لپ اسٹک بھی نہ لگاٸی تھی ۔
بس اب دوبارہ سے سیدھی ہو کے بیٹھ جاٶ ، کہتے کہتے بیوٹیشن نے ایک چھوٹے باکس میں سے جُوڑا پنز نکالیں ، عاٸزہ نے آٸینے پہ ایک تعریفی نگاہ ڈالی اور اسے رکھنے ہی لگی تھی کہ دروازہ زور سے دھڑدھڑایا گیا۔ اس کے ساتھ اماں کی چیختی چنگھاڑتی آواز
”عاٸزہ اری عاٸزہ “
آٸینہ اس کے ہاتھ سے ٹوٹ کر گرا اس کی کرچیاں بکھر گٸیں اور اس کے اندر کی دلہن بھی کرچیوں کی شکل میں ہی بکھر گٸی ۔
تیزی سے اٹھ کے اس نے دروازہ کھولا
کتنی بار کہا ہے یوں کمرہ بند کر کے نہ بیٹھا کر پر سنتی کب ہے یہ لڑکی
”سوٸی ہوٸی تھی اماں“ وہ منمناٸی
”ہونہہ سوٸی ہوٸی تھی چل باہر آ “
وہ سوچنے لگی ، اب اماں کل کے آنے والے خاص مہمانوں کے لیے کوٸی پلان بتاٸیں گی اچھا کھیر تو آج رات میں ہی بنا کے رکھ لوں گی اور بریانی اور قورمے کے مسالوں کی پسا ۔۔۔۔
”اری سن“ اماں نے اس کا خواب توڑا ”وہ ابھی ہاجرہ بوا آٸی تھیں ، جس لڑکے کے لیے اس بار تجھے پسند کیا گیا اس کی تصویر بھی لاٸی تھیں “
”اوہ اچھا“وہ شرما گٸی
”تصویر دیکھ کر میں نے اس رشتے سے انکار کر دیا
اس کی آنکھیں چھوٹی اور رنگت سانولی ہونہہ
میں نے بوا سے کہہ دیا ہے کہ ان لوگوں سے کہہ دیں ، کل شادی کی تاریخ لینے کے لیے آنے کی کوٸی ضرورت نہیں۔ ہماری طرف سے اس رشتے سے انکار ہے “
میری بیٹی کو لینے کے لیے تو کوٸی شہزادہ آٸے گا شہزادہ“
اور اس نے ہمیشہ کی طرح لب سی لیے ۔ ایک لفظ بھی شکوے کا نہ نکالا
کٸی بار کی رد کی اور کٸی بار کی انکار کرواٸی گٸی ستاٸیس سالہ عاٸزہ چپ چاپ دوبارہ کمرے میں چلی آٸی جہاں کچھ دیر پہلے اس کے تخیل میں اسے دلہن بنایا جا رہا تھا ۔
لیکن اب اس دلہن کے چہرے سے میک اپ کسی نے اتار دیا تھا ۔ آنکھیں لہو بہا رہی تھیں ، خوبصورت لہنگے کے موتی کسی نے نوچ لیے تھے ۔ نیکلس گر کر ٹوٹ گیا تھا ۔۔ کانچ کی نازک چوڑیاں ٹوٹ کر اس کی کلاٸیاں زخمی کر گٸی تھیں ۔ کنگن کسی نے کھینچ کے اُتارے تھے ، کلاٸی کی ہڈی میں زور سے درد ہوا ، مہندی غاٸب ہو گٸی تھی ۔ ہاتھ سُونے ہو گٸے تھے ۔ لپ اسٹک کی جگہ کسی نے اس کے ہونٹوں پہ سیاہی مل دی تھی ۔ بال بکھرے ہوٸے تھے ۔ تصور بین کر رہا تھا اور دُلہن اجڑ گٸی تھی
شہزادہ کہیں گم ہو گیا تھا
