عجیب سوال

*عجیب سوال*

*تحریر : ساجدہ بتول*

”ہمارے سوال کا جواب دیا جاٸے “ بادشاہ سلامت چلاٸے تو دربار میں موجود ہر شخص سہم گیا ۔
”حضور! میرے پاس ایک تجویز ہے “ یہ بادشاہ سلامت کا خاص ملازم تھا وقار
”بتاٶ“بادشاہ سلامت نے وقار سے وقار کو جواب دیا

”حضور! جیسا کہ آپ کے وزیر با تدبیر حاکم خان سفر پہ گٸے ہوٸے تھے ، ان کو آپ کے اس سوال کا علم نہیں ہو سکا ، مگر آج وہ سفر سے لوٹ چکے ہیں ۔ اب جبکہ دربار میں سے کوٸی بھی اس سوال کا جواب نہیں دے سکا ، آپ محترم حاکم خان کو بلوا کر ان سے اس سوال کا جواب معلوم کیجیے ۔ امید ہے وہ ضرور جواب دیں گے ۔
”خوب ۔۔۔ بہت خوب“ بادشاہ سلامت مسکراٸے ”حاکم خان کو طلب کیا جاٸے“
جلد ہی حاکم خان آ پہنچا ۔

”حاکم خان! ہمارے ایک سوال کا جواب دو ، اگر تم نے جواب دے دیا تو ہم اپنے پھلوں والے دس باغ تمہارے نام کر دیں گے “
حاکم خان کے چہرے پہ لالچ پھیل گیا ۔ وہ لگا سر دھننے اور دماغ بننے ۔ دماغ کا بننا اس لیے ضروری لگا کہ وہ بھی وزیر با تدبیر تھا ، سمجھ گیا کہ اور کوٸی بھی اس سوال کا جواب نہیں دے سکا تو ہی دس باغوں کی قربانی طے ہوٸی ہے ۔ جب کوٸی اور جواب نہیں دے سکا تو اس کا مطلب ہے سوال ذرا مشکل ہے لہٰذا اس کے پاس جتنا دماغ اویل ایبل ہے وہ ناکافی ہو گا ۔
وقار سمیت باقی سب جی ہی جی میں ہاتھ ملنے لگے ۔ وقار کے تو وہم و گمان میں بھی نہ تھا کہ اس کا مشورہ حاکم خان کو اس قدر مالدار بھی کر سکتا تھا!! ورنہ وہی کچھ ہاتھ پیر مار کر جواب معلوم کر لیتا ۔ مگر بادشاہ سلامت کو بھی دس باغ دینے کا فیصلہ مجبوری میں کرنا پڑا ورنہ کہانی کیسے آگے چلتی! تو بھٸی کہانی آگے چلانے کے لیے کہانی میں بادشاہ سلامت کو دس باغ تو دینا پڑیں گے۔ اب دس باغوں کی کتھا شروع کرنے کے لیے کہانی میں جواب پہلے کوٸی بھی نہیں دے سکتا ٰلہذا قارٸین! سن لیجیے بادشاہ سلامت کو پہلے جواب کسی نے بھی نہیں دیا تھا ۔ اور یہ بات جھوٹ بھی نہیں ہے ۔ قارٸین! ہم شرط لگا کر کہتے ہیں بادشاہ سلامت کو اور کوٸی بھی جواب نہیں دے سکا تھا ۔ یقین نہیں آتا تو اوپر کی سطور دوبارہ پڑھ لیں ۔ یہی لکھا ہوا ہے ۔
دربار میں موجود تمام درباری اور وزیر و مشیر چہ میگوٸیاں کرنے لگے ”یہ دس باغ لے اڑے گا “ وہ بھی جانتے تھے حاکم خان ذہین ہے ۔۔ مگر کیا کیا جاٸے کہ حاکم خان خود کو ذہین نہیں مانتا کیونکہ خود کو ذہین کہہ کر ذہین ہونے کی قیمت دینا پڑتی ہے اور پھر اگر ذہین ثابت نہ ہو پاٸے تو بے عزتی الگ ۔ اس لیے ذہین لوگ خود کو ذہین نہیں کہتے ۔
”جج ۔۔۔۔۔۔۔ جج ۔۔۔۔ جی حضور! آپ سوال پوچھیے ۔ “ حاکم خان خوشی سے کانپتے ہوٸے بولا ۔
”یہ آج سے ایک ہفتہ پہلے کی بات ہے ، جب پڑوسی ملک کے بادشاہ سلامت سفر کر کے ہمارے ملک آٸے اور ہمارے مہمان ہوٸے ۔ وہ اس وقت تھکے ہوٸے تھے ۔ ان کو کھانا کھانے اور آرام کرنے کا وقت دیا گیا ۔ ۔۔۔ اگلے روز ناشتے کے بعد ہماری ان کے ساتھ محفل جمی ، تو ہم نے ان سے پوچھا ، آپ کو ہمارا محل کیسا لگا ؟ اور یہاں پہ اب تک کیا مصروفیت رہی ؟ ۔۔۔ انہوں نے نہایت عجیب جواب دیا ۔۔ ان کے الفاظ یہ تھے ”آج کی مصروفیت یہ رہی کہ ہم جب نیند سے بیدار ہوٸے تو ایک بہت نرم آواز سنی ، پھر ہم نے اٹھ کر ایک نرم چیز کے ذریعے ایک انتہاٸی نرم چیز حاصل کی ، اور کچھ دیر بعد ہم ایک نرم دل والوں کی قدر کرنے والے کے سامنے پہنچے ۔ اس کے بعد ہم نے ایک نرم قسم کے دل سے اپنے دل کو سکون پہنچایا ۔“
وزیر با تدبیر! ہمیں ان الفاظ کی خاک سمجھ نہ آٸی تھی مگر ہم نے مناسب نہ جانا کہ ان الفاظ کا مطلب ان بادشاہ سلامت سے پوچھیں ، اب جبکہ پڑوسی ملک کے بادشاہ سلامت واپس جا چکے ہیں ، ہم نے اپنے تمام وزیروں ، مشیروں ، خادموں اور درباریوں سے اس بات کا مطلب پوچھ لیا ہے ، مگر کوٸی بھی ہمارے سوال کا جواب نہیں دے سکا ۔۔۔ اب دس باغ چاہتے ہو تو سوال کا جواب معلوم کرو ۔ ورنہ ہمیں اپنی ملکیت کی رقم سے دس باغ خرید دینا “
”ہاٸیں!!!“ کٸی مونہوں سے ایک ساتھ نکلا لیکن دبی زبان میں ۔ بھٸی سامنے بادشاہ سلامت تھے ۔
”جی حضور! آپ کا حکم سر آنکھوں پر ۔ “ حاکم خان کانپتے ہوٸے بولا ۔ اب کی بار وہ خوف سے کانپا تھا ۔ یقین نہیں آتا تو یہ سطور دوبارہ پڑھ لیں ۔ یہی لکھا ہوا ہے ۔
کچھ دیر بعد وہ اپنے گھر
پہنچا تو اس کے چہرے پہ آدھی خوشی آدھا غم دیکھ کر اس کی بیٹی چونک گٸی ۔
”ابا جان! خیریت تو ہے ناں ؟؟“
جوابًا حاکم خان نے تمام قصہ کہہ سنایا ۔
”بس! اتنی سی بات!! “ جویریہ مسکراٸی
”گویا تم جواب دے سکتی ہو!“ حاکم خان کی آنکھوں میں چمک آ گٸی ۔
”جی ہاں ابا جان! غور کیجیے ۔۔۔ ایک مسلمان جب صبح سویرے جاگتا ہے ، وہ سب سے پہلے کیا کام کرتا ہے !!“
”ظاہر ہے ۔۔۔ نماز ادا کرتا ہے ۔“ حاکم خان حیران حیران سا بولا ۔
”جی نہیں ، وہ پہلے وضو کرتا ہے ۔ “
”تو اس سے کیا ہوا؟؟“ حاکم خان کی سمجھ میں ابھی بھی کچھ نہیں آیا تھا ۔
”خیر! آپ پہلے یہ بتاٸیے ، بادشاہ سلامت نے اس سوال جواب کے لیے دس دس باغوں کی شرطیں کیوں لگاٸی ہیں ؟“
”اس لیے کہ ان کو سوال کا جواب نہیں مل سکا ۔ “ حاکم خان بولا
”جی نہیں ۔۔۔۔ وہ شراٸط لگا کر ہر صورت میں جواب اس لیے معلوم کرنا چاہتے ہیں کہ ان کو حسد ہو گیا ہے کہ ان کے محل میں وہ کون ہے نرم دل والوں کی قدر کرنے والا ، جس کو بادشاہ سلامت پر فوقیت دے کر پہلے اس سے ملاقات کی گٸی ؟ اور پھر اس کی تعریف بھی ان الفاظ میں کی گٸی “
”بیٹی! تم بہت ذہین ہو ۔ “ حاکم خان نے کانپتے ہوٸے جویریہ کے سر پہ ہاتھ رکھا ۔ اس بار وہ سردی سے کانپا تھا کیونکہ کہانی کا یہ حصہ ہم سردی میں لکھ رہے ہیں ۔
”اب ان الفاظ کا مطلب سنیے “ جویریہ بولی ”پڑوسی ملک کے بادشاہ سلامت نے بیدار ہونے کے بعد جو بہت نرم آواز سنی ، وہ اذان کی آواز تھی ۔ وہ نرم چیز جس کے ذریعے نرم چیز حاصل کی ، انسانی ہاتھ ہے ، یعنی بادشاہ سلامت کا ہاتھ ۔ ۔۔ جو انتہاٸی نرم چیز حاصل کی ، وہ پانی تھا ، جس سے انہوں نے وضو کیا ۔۔ نرم دل والوں کی قدر کرنے والے سے مراد اللہ تعالیٰ ہیں جن کے سامنے وہ بادشاہ سلامت گٸے ، یعنی انہوں نے نماز ادا کی ۔۔ اور وہ نرم قسم کا دل جس سے انہوں نے اپنے دل کو سکون پہنچایا ، وہ تھی سورہ یٰسین یعنی قرآن پاک کا دل ۔“
حاکم خان کی آنکھوں میں چمک آ گٸی ۔ خوشی کے مارے اس نے بیٹی کا ماتھا چُوم لیا ، جس کی ذہانت نے آج اس کے دس باغ بچا لیے تھے اور دس باغ نٸے بھی دلا دیے تھے ۔ کچھ دیر بعد وہ بادشاہ سلامت کے سوال کا جواب دینے کے لیے ان کے محل کی جانب رواں دواں تھا ۔ دس عدد باغ ہتھیانے کے لیے ۔ ہاں جی اور کیا