خزانے کی تلاش

خزانے کی تلاش کی گیارھویں قسط ملاحظ کیجیے۔

قسط 11

اُس کے پیروں میں چھالے پڑ گٸے تھے ۔ ہڈیاں ٹوٹ رہی تھیں ۔ تھکن انگ انگ میں سما چکی تھی مگر وہ دوڑا چلا جا رہا تھا ۔ آنکھوں کے آگے دھند سی چھاٸی تھی ۔ اور اسے اسی دھند کے چھٹنے کا انتظار تھا ۔ دوڑتے دوڑتے اچانک اسے محسوس ہوا ، کسی نے اس کا دامن کھینچا ہے ۔ وہ لڑکھڑایا اور پھر گرنے کو تھا کہ دو مضبوط بازٶوں نے اسے تھام لیا ۔ اب وہ رک چکا تھا ۔ اُسی دم آنکھوں کے سامنے سے دھند چھٹ گٸی ۔ اس نے حیرت سے آنکھیں داٸیں باٸیں گھماٸیں ، وہ مہربان چہرہ ۔۔۔۔۔۔۔۔ یقینًا کوٸی بریشین تھا جو اب اس کا ہاتھ تھامے کھڑا تھا ۔
”گفٹ چاہیے ؟“
اسی مہربان نے پوچھا
”ہاں“ ، غیر اختیاری طور پہ اس کی زبان پھسلی ۔
”تو یہ لیں ۔“
اس نے حیران ہو کر اسے دیکھا ۔
مہربان کے ہاتھوں میں ایک کتاب تھی ، جس کے سر ورق پہ جلی حروف میں ”قرآن مجید “ لکھا تھا ۔
اس نے ہاتھ آگے بڑھایا ۔ اس سے قبل کہ وہ اسے تھامتا ، اس کی آنکھ کھل گٸی ۔
”اوہ گاڈ ۔“ اس نے حیرت سے ارد گرد دیکھا ۔ اُف یہ خواب تھا ؟
سوچتے سوچتے وہ پچھلی رات کو واپس جا پہنچا ، جب سن شاٸن میں عذاب کی آیات پڑھ کر وہ پھوٹ پھوٹ کر رویا تھا اور پھر قرآن پاک وہیں رکھ کے واپس آ گیا تھا ۔
اُس نے وقت دیکھا ۔ شام کے چھ بج رہے تھے ۔ آج وہ دن میں ہی اس لیے نیند لے کے تازہ دم ہو گیا تھا کہ آج رات اسے ایک معرکہ سر کرنا تھا ۔
آنکھیں ملتے ہوٸے اٹھ کے بیٹھنے کے بعد اس نے موباٸل اٹھایا ۔ چند لمحے اُس پہ کھٹ پٹ کے بعد وہ ایک کال مِلا چکا تھا ۔
”جی سر! کیسے ہیں آپ ؟“
”میں! میں تو بالکل تیّار ۔“
”سَر! کتنے اچھے ہیں ناں آپ! اُس دن جب میں نے راولا ہوٹل میں حسن اور سعید کی باتیں سُننے کے بعد آپ کو اپنی تپسیا کی کتھا سناٸی ، آپ کا دل ایسا پگھلا کہ آپ مُسلمان ہونے کے لیے تیار ہو گٸے!!
ایسا کیسے ہو گیا آخِر ؟ کہ آپ نے فورًا میری مدد بھی کرنے کی حامی بھر لی! “
دُوسری طرف وہ نجانے کیا کیا بتا رہے تھے وہ سن کے مسکراتا رہا اور پھر فون بند کرنے کے بعد اپنی ضرُوری تیّاری کرنے لگا ۔
تین گھنٹے کے بعد وہ سن شاٸن میں موجود تھا ۔ اب اسے انتظار تھا تو حسن اور اس کے ساتھیوں کا ۔

کیپٹن چارلس اِس وقت کُرسی پہ بیٹھا بِلا وجہ ہی ہل رہا تھا یا شاید جھوم رہا تھا ۔ شِرک کے مندر سے وحدانیت کے اندر تک پہنچنے کا سفر تو اس نے بھی طے کیا تھا اِسلام کا بغور مطالعہ کر کے ۔ بیسیوں کتابیں کھنگال ڈالنے کے بعد وہ اِسی نتیجے پہ پہنچا تھا کہ خدا صرف ایک ہے ۔ اور وہ اکیلا اللّٰہ ہے ۔ اُس کے ساتھ کوٸی شریک نہیں جو خداٸی میں اس کی برابری کرے اور کوٸی انسان خواہ نبی ہی ہو ، وہ اللّٰہ کے ساتھ مِل کے خُدا نہیں ہو سکتا ۔ عین وہ وقت جب وہ اسلام کی حَقّانیت کو دل سے قبُول کرنے پہ تیار ہوا ، ”وہ“ اس سے مدد مانگنے آ پہنچا تھا اور کیپٹن چارلس حیران ہو رہا تھا کہ کِتنا پیارا ہے وہ اللّٰہ ، جِس کی آغوشِ محبّت میں جانے کا ابھی اس نے فیصلہ ہی کیا تو اس نے اسے اپنے کام پہ لگا دیا!
قربان اللّٰہ تیری قدرتوں پہ ، تیری چاہت پہ ، تیری حکمت پہ ، تیری مصلحت پہ ، تیرے فیصلوں پہ ، تیرے اِسلام پہ ، تیرے کام پہ ، تیرے قرآن پہ اور تیرے پیارے نبی صلّی اللّٰہ علیہِ وسلّم پہ میں قربان ۔ اِس کہانی کی روح قُربان ۔ میرا قلم قربان ۔ میری خُوشیاں قُربان ۔ میرا درد قربان ۔
اے اللہ! اے میرے پیارے! آج میں تیرے راستے کے لیے بہت بڑی سپورٹ دینے جا رہا ہوں ۔ دیکھ مُجھے مایوس نہ ہونے دینا اللّٰہ اے اللّٰہ
سادہ سے انداز میں کہے گٸے اس لفظ میں کوٸی تو بات تھی کہ اس کی آنکھیں نم ہوٸیں اور پھر ان میں سے ایک سیل رواں بہہ نکلا
وہ تو عربی زبان سے قطعی نا بَلد تھا ۔ اُسے تو معلوم ہی نہ تھا کہ تجوید کیا ہوتی ہے ۔ اُس نے اِس پیارے نام کو نہ تو پُر پڑھا ، نہ ہی اس پہ ہونٹ گول کٸے مگر اس کا دل تھا کہ گول ہوٸے جا رہا تھا مُسلسل اس نام کا طواف کر رہا تھا ۔ وہ خمیری مُسلمان جو ابھی مُسلمان بھی نہ ہوا تھا جس کو اللّٰہ کی ذات کے اسرار و رموز کا کُچھ عِلم نہ تھا ۔ جس کی زندگی مذہب کے نام پر ایک چرچ سے دُوسرے چرچ جاتے تباہ ہوٸی تھی ۔ وہ اللّٰہ کے نام کو اِس پیار سے لے رہا تھا کہ کوٸی تھا جِس نے اس کے دل کو چُوم لیا ۔
ماٶں کی گودوں میں ایمان کی دولت پا لینے والے کیا جانیں ، ایمان کس قدر قیمتی میراث ہے!! ارے پوچھیے اُن نو مُسلموں سے جو ایمان لانے کی پاداش میں درد بدر کر دیے گٸے ، کبھی ان کے جسم سیگریٹوں سے داغے گٸے کبھی ڈنڈوں سے پیٹے گٸے ، کبھی ان کو گھروں سے نکال دیا گیا ، کبھی سُولیوں پہ چڑھا دیا گیا اور کبھی گولیوں سے چھلنی کر دیا گیا مگر انہوں نے اس دولت کو نہیں چھوڑا ، جانتے ہیں کیُوں ؟
کیُونکہ انہوں نے اس کو حاصل ایسے شدید جذبے سے کیا کہ پھر اللّٰہ نے انعام میں اُن کو اس پہ مضبُوط رہنے ، جمے اور ڈٹے رہنے کا حوصلہ عطا کر دیا ۔
آج ہم ! دو ٹکے کے رشتے پہ بِک جاتے ہیں ، ہم مہندی کیسے نہ کریں! لڑکے والے رشتہ توڑ دیں گے ۔
شادی میں پردے کا اِنتظام کیسے ہو ، لڑکے کا باپ ناراض ہو گا .
فلاں رسم کیسے نہ کریں! ہم برادری میں رُسوا ہو جاٸیں گے ۔۔
سُنّت کے مطابق شادی کیسے کریں! لوگ ہمیں طعنے دیں گے ۔
میں دعوے سے کہتی ہوں ایک بار سو فیصد دین پہ چلنے کا عزم اللّٰہ کے لیے کیجیے آپ کا ایمان بھی پہاڑوں جیسا مضبوط کر دیا جاٸے گا آپ بھی پھر پورے پورے خاندان سے یونہی ٹکرا جاٸیں گے مگر ایمان کے کسی ایک جز کا بھی سودا نہ کریں گے
ایک بار نماز کی عادت بنانے کا پکا ارادہ کیجیے ، دنیا کی کوٸی بڑی سے بڑی طاقت آپ کو نماز سے روک نہ سکے گی ۔حتیٰ کہ اگر آپ کا اپنا دل بھی نماز پڑھنے کا نہ چاہے ، وہ بھی ناکام ہو جاٸے گا ۔آپ کو جاٸے نماز سے ہٹا نہیں سکے گا ۔ آپ چاہیں گے کہ آپ نماز نہ پڑھیں ، مگر کوٸی نا دیدہ قُوّت آپ کا وضو کروا کے آپ کو جاٸے نماز پہ لا کھڑا کرے گی ۔
ارادہ تو کیجیے ، ایک بار دین پہ چلنے کا پَکّا ارادہ ۔۔ دل کی ایڑیوں کو رگڑنا شرط ہے ۔ مضبوط قُوّتِ ارادی اور عمل کا چشمہ اِنہی ایڑیوں کے نیچے سے پھوٹے گا ۔
ہاں خطرہ ہوتا ہے ، کہیں شیطان حملہ نہ کر دے ، نفس گرا نہ دے! خاندان رُسوا نہ کر دے ۔ مگر خوف نہیں رہتا ۔
کیا کہا ؟ توبہ کی پھر گناہ ہو گیا ؟
اِس کی تَکوِینی وجہ تو وُہی ہے کہ نفس و شیطان نے حملہ کر دیا ۔ مگر تکنیکی وجہ یہ ہے کہ آپ کی توبہ کچی تھی ۔ اب پچھلی توبہ سے پکی توبہ کیجیے ، پھر گناہ ہو جاٸے تو اور پکّی توبہ ۔۔ پھر ہوجاٸے اور پکّی ۔ پھر ہو جاٸے اور پکّی ۔ ایک دن اللہ کی جانب سے مضبُوط قُوّتِ ارادی کے مالک کر دیے جاٸیں گے بِالکل انہی نو مُسلموں کی طرح ، جو حق کی جانب آتے ہیں تو ایسے مضبوط ہوتے ہیں کہ اپنا آپ اُس مضبوط ارادے کے پہاڑ کے نیچے دبا دیتے ہیں ۔ مگر ارادہ نہیں گرنے دیتے ۔
سُنو اے نو مُسلِمو! تُم جب حق کی جانِب قدم بڑھاٶ گے ، یہ خطرہ تُمہیں بھی ہو گا کہ کہیں ہار نہ جاٶ ، تُم اِس راستے پہ قَدم رکھنے کے بعد کٸی بار ڈگمگاٶ گے ، لڑکھڑاٶ گے ۔ دھتکارے جاٶ گے ٹھکراٸے جاٶ گے ۔۔ ذلِیل کر دیے جاٶ گے در بدر ہو جاٶ گے ۔۔ خاندان سے کٹ جاٶ گے ۔۔ اپنے پیاروں سے جُدا ہو جاٶ گے ، کبھی چھریوں سے کاٹ دیے جاٶ گے ۔۔ کبھی گولیوں سے چھلنی کر دیے جاٶ گے ۔۔ کبھی سُولی چڑھا دیے جاٶ گے اور کبھی خُود مُسلمان بھی تمہیں پناہ دینے سے اِنکار کر دیں گے ۔ مگر میری یہ درد بھری اِلتجا سُن لو ۔ اس راستے کو نہ چھوڑنا ۔ یہ اِنتہاٸی قیمتی راستہ ہے ۔ بہت بڑی دولت سے نوازے گٸے ہو ۔ جنّت تُمہارے لیے سجا دی گٸی ۔ آساٸشیں تُمہارا اِنتظار کر رہی ہیں ، ابدی عَیش و عِشرت تمہارا مُقدّر بن چُکی ہے ۔ جہنّم سے رہاٸی پا گٸے ہو ۔ سب سے بڑھ کے یہ کہ پوری کاٸنات کے محبُوب ۔ سرورِ کونین ، رحمتِ دو جہاں ، آقا و مولا ،پیارے نبی صلّی اللّٰہ علیہِ وسلّم کے دامنِ رحمت میں آ گٸے ہو ۔ یہ کوٸی چھوٹی بات نہیں ، ہاں تم تھک رہے ہو ، مگر محبوب کے مُبارک ہاتھوں سے جامِ کوثر بھی تو مِلے گا ۔ بہت بڑی مُشقّت ہے مگر بہت بڑی سعادت ہے ۔ بہت مُشکِل کام ہے مگر بہت بڑا انعام ہے ۔ بہت کٹھن اِمتحان ہے مگر جَنَّت کا سامان ہے ۔ مُشکل ہے تو کیا ہوا! آسانی قریب ہے ۔ غم بہت ہیں تو کیا ہوا! خُوشی ملنے والی ہے ۔ تکلیف ہے تو کیا ہوا! آرام ملنے والا ہے ۔ درد ہے تو کیا ہوا! راحت نصِیب ہونے والی ہے ۔ زندگی جہنّم بن گٸی تو کیا ہوا! جنّت ملنے والی ہے ۔ پیاروں سے جُدا ہو گٸے تو کیا ہوا! نبیِ رحمت اور معشُوقِ خُدا پیارے نبی صلّی اللّٰہ علیہِ وسلم کا ساتھ بھی تو مِل رہا ہے!! اور جب محبُوب کا ساتھ مِل جاتا ہے ، سارے غم غلط ہو جاتے ہیں ۔
وہ شخص بھی ایک خمیری مُسلمان تھا ، جو اللّٰہ کی یکتاٸی کے داٸرے میں آنے کو بے تاب تھا اور محبُوبِ دو جہاں نبی صلی اللّٰہ علیہِ وسلّم کی محبّت پانے کے لیے بے قرار تھا ۔
اللّٰہ! دیکھ تُجھے اُسی نبی کا واسطہ ہے جِن کے دامن میں پناہ حاصِل کرنے کے لیے میں یہ کام کرنے جا رہا ہوں ۔ وہ مدینہ والے محمّد صلّی اللّٰہ علیہ وسلّم مُجھے ایک دم بہت پیارے لگنے لگ گٸے ہیں ، اُن کی خاطر ۔۔۔ ہاں اُن کی خاطِر میری مدد کر ۔ وہ انجینٸرز تو مٹھی بھر مُسلمان ہیں ۔ لیکن میرے پاس عُہدہ ایسا ہے کہ میں پوری حکُومت کو جھکانے کی ایک کوشِش ضرُور کر سکتا ہوں ۔ دیکھ میری لاج رکھنا ۔ مُجھے مایُوس نہ کرنا ۔ میں تو ابھی مسلمان بھی نہیں ہوا ۔ تیرا مہمان ابھی اب بنوں گا ۔ اپنے مہمان کا اِستقبال کر ۔ میرے لیے مدد کے دروازے کھول دے ۔ اپنا قرآن بچا لے ۔ میرا ایمان بچا لے ۔ تُجھے تیرے نبی کا واسطہ ہے ، اللّٰہ تُو بچا لے ۔ ہمیں کامیاب کر دے ۔ کر دے ناں ، مَیں تو تُجھے ابھی پُوری طرح جانتا بھی نہیں ہوں ، ابھی تو شِرک سے ہی نہیں نِکلا ، لیکِن نکل آٶں گا ۔ تُو بس مجھے کامیاب کر دے تجھے تیرا واسطہ ، تُو مجھے کامیاب کر دے ۔۔ تیرے نبی کا واسطہ ، مُجھے کامیاب کر دے ۔۔ تیرے قُرآن کا واسطہ ، مُجھے کامیاب کر دے ۔۔تیرے اسلام کا واسطہ ، مجھے کامیاب کر دے تیری یکتاٸی کا واسطہ مجھے کامیاب ۔۔۔۔۔۔۔“
بولتے بولتے اُس کی آواز رندھ گٸی الفاظ حلق میں اٹک گٸے اور اُن کی جگہ آنسُو بولنے لگے ۔
کُچھ توقّف کے بعد اُس میں کُچھ ہِمّت آٸی تو وہ پھر گویا ہوا ۔
بس میرے ساتھ آ جا . آہ آ جا ۔ بس آ جا ۔اے میرے دوست اللّٰہ جلدی آ جا ۔ آ جا ۔۔ آجا ناں! اللّٰہ! اللّٰہ
کہتے کہتے وہ زور زور سے اللّٰہ اللّٰہ اللّٰہ پکارنے لگا جیسے دُور سے کِسی کو بُلا رہا ہو ۔ آنسٶوں کا دریا بہہ رہا تھا ۔

اللّٰہ اللّٰہ بول بندے اللّٰہ سب سے پیارا
ہم نے ہر مُشکل میں اپنے اللّٰہ کو پُکارا
جِس نے پیارے اللّٰہ کی وحدانیت کو مانا ہے
یہ دُنیا کیا چیز ہے غالِب یہ دُنیا افسانہ ہے
اللّٰہ سب کا مالِک ہے اللّٰہ سب کا سہارا
ہم نے ہر مُشکل میں اپنے اللّٰہ کو پُکارا
اللّٰہ کی وحدانیت سے جِس نے بھی اِنکار کیا
آگ جہنّم پا لیا خُود کو اُس میں گِرا دیا
مُشرِک کو نہیں مِلتا جہنّم سے چھٹکارا
ہم نے ہر مُشکل میں اپنے اللّٰہ کو پُکارا
ایک خُدا کے سامنے سر کو جھکانا اچھا ہے
اللّٰہ واحِد ہر جا حاضِر یہ عقیدہ سَچّا ہے
نبیوں کو جو خُدا مانے اللّٰہ کو نہیں گوارا
ہم نے ہر مُشکل میں اپنے اللّٰہ کو پُکارا
خوفِ خُدا کو دل میں بساٶ یہ دُنیا تو فانی ہے
موت ہر ذی روح کے لیے ایک دن تو آنی ہے
کوٸی بھی نہیں آٸے گا دنیا میں دوبارہ
ہم نے ہر مُشکل میں اپنے اللّٰہ کو پُکارا
مَیں عزیزُ اللّٰہ غالِب تیرے در کا گداگر ہُوں
لا اِلٰہَ اِلَّا اللّٰہ میں ادنیٰ سا ثناءگر ہُوں
چَمکے گا اِک دن میرے نصِیب کا سِتارہ
ہم نے ہر مُشکل میں اپنے اللّٰہ کو پُکارا

وہ آواز سر سے پَیر تک چادر میں چھپی ہوٸی تھی ۔ بس آنکھیں ننگی تھیں ۔ صاف پتہ چل رہا تھا ، وہ آواز بدل کر بول رہا ہے ۔
”تت ۔۔۔۔۔ تُم کون ؟“ پہریدار حیران رہ گٸے ۔
”کوٸی فاٸر مت کرے ۔“ نقاب پوش اُن کی بات کا جواب دینے کے بجاٸے گرجا ۔
”مگر تُم ہو کون ؟“ پہریدار اب ہَکّا بَکّا تھے ۔ اُن کی حیرت بجا تھی ۔ کیونکہ وہ نقاب پوش نوجوان کہیں باہر سے نہیں آیا تھا بلکہ ۔۔۔ سن شاٸن کے اندر سے نکلا تھا ۔
اُن کے ہاتھ پیر پھول گٸے ۔۔ عجیب صورتحال پیدا ہو چُکی تھی ۔ اندر بھی دُشمن اور باہر بھی!! باہر کے دُشمن تو سمجھ میں آتے تھے ، مگر اندر راتوں رات کون سا دُشمن پیدا ہو گیا ؟ یہ اُن کی سمجھ سے بالا تر تھا ۔ وہ حیران پریشان کبھی اُن پانچ سو افراد کو دیکھتے اور کبھی نقاب پوش کو ۔۔۔۔ اِدھر حَسَن اور اُس کے ساتھی ابھی تک ساکَت کھڑے اس کو دیکھ رہے تھے ۔ ان کی سمجھ میں کچھ نہیں آ رہا تھا کہ آن کی آن میں یہ کیا ہو گیا ؟؟ آیا یہ دوست ہے یا دُشمن ؟
”اندر آنے دو ان سب کو ۔“ نقاب پوش غُصّے سے بولا ۔
حَسَن اور اُس کے ساتھی مزید حیران ہو گٸے ۔۔ یہ کون تھا جو خُود اُن کو اندر آنے کی دعوت دے رہا تھا ؟؟؟
”ہم اِن کو اندر نہیں آنے دیں گے بلکہ تُمہیں بھی گرفتار ۔۔۔۔۔۔ “
ایک پہریدار بولا تھا مگر اس کے الفاظ درمیان میں ہی رہ گٸے ۔ کیُونکہ اُن سب کو کُچھ شور سا محسُوس ہوا تھا ۔ سب نے شور کی جانب دیکھا ۔ وہ دو ہیڈ لاٸیٹس تھیں جو قریب آ رہی تھی ۔ جب قریب آٸیں تو ان کے ساتھ ایک کار جُڑ گٸی ۔ تاریک رات تھی ۔ پہلے کار دِکھاٸی نہ دی تھی ۔ نا سمجھی اور پریشانی کے سے عالَم میں اُن سب نے اُس پہ نگاہیں ٹِکا دیں ۔ کچھ لمحوں کے بعد کار کا دروازہ کھلا اور ایک شخص باہر نکلا ۔ جب وہ قریب آیا تو اُس کے چہرے پہ نظر پڑتے ہی وہ سب ہَکّا بَکّا رہ گٸے ۔ سب کے سب خوفزدہ ہو گٸے ۔ پہریدار سہم گٸے ۔ انجینٸرز کو اپنے ارادے متزلزل ہوتے محسُوس ہوٸے ۔ حسَن گھبرا گیا ۔
( خزانے کی تلاش جاری ہے)