*
قسط 2
خزانے کی تلاش کی دوسری قسط ملاحظ کیجیے
۔۔۔۔۔۔۔
”دیکھیے سر! قُرآن کے نُسخے یہ ہیں جو الماریوں کے اندر شیلفوں میں رکھے ہیں ۔ ہم نے یہ بہت کوشش اور محنت کر کے حاصِل کیے ہیں ۔ اب شدت سے 20 ستمبر کا انتظار ہے ۔ ہمیں ڈر ہے ، کوٸی اِن پہ ڈاکہ نہ ڈال لے ۔ آپ کو معلوم ہی ہے ، اس مُلک میں مُسلمان بھی رہتے ہیں “
برنیٹ نے ایک ہی سانس میں بات مکمّل کی ۔
سن شاٸن کے چٸیر مین زابِیل نے ایک نظر ذخیرے پہ ڈالی اور پھر ایک مکرُوہ قہقہہ مارا ”ہاہاہاہا ۔۔۔ ذرا سوچو! جب پُوری دنیا کی ٹی وی اسکرین پہ قُرآن جلتے نظر آٸیں گے تو ساری دنیا کے مُسلمانوں کا کیا حال ہو گا!!“
”آپ ٹھیک کہتے ہیں سر! مگر مجھے ڈر۔۔۔۔۔ “
برنیٹ کی بات درمیان میں ہی رہ گٸی کیونکہ باہر سے کِسی کی باتوں کی آواز آنے لگی تھی ۔۔۔۔ یہ ایک بہت بڑا ہال تھا جس کی ایک کھڑکی لان میں کھلتی تھی ۔ آواز لان سے ہی آ رہی تھی ۔
”ارے! یہاں کون آ گیا ؟“
وہ حیران ہوٸے
اُدھر کوٸی کہہ رہا تھا ” دیکھو وقاص یہ بات کسی کو معلوم نہ ہو ۔ یہ ایک راز ہے جو میں صِرف تُمہیں دے رہا ہوں ۔ کِسی کو بتانا مت ۔۔۔ بات یہ ہے کہ اس بِلڈنگ میں خزانہ موجود ہے “
”خزانہ؟؟؟“
حیرت سے پُر یہ لفظ صرف باہر موجود شخص کے مُخاطِب نے نہیں کہا تھا ، بلکہ وہ دونوں بھی ایک ساتھ بولے تھے ۔
”ہاں خزانہ“ وہی آواز ایک بار پھر ابھری ”اگر قُرآن جلانے کی تاریخ مٶخر ہو جاٸے تو ہم وہ خزانہ حاصل کر سکتے ہیں “
”وہ کیسے“ دوسرے شخص کی آواز سناٸی دی
یہ بھی پڑھیے
”اگر 20 ستمبر تک قرآن نہ جلاٸے گٸے تو ہم 21 ستمبر کی صُبح آ کر وہ خزانہ نکال لیں گے “
”کیا خزانہ اِن نُسخوں کے اندر ہے ؟“ دُوسرے شخص کی آواز گونجی ۔
”ہاں۔۔۔ مگر اُسے صِرف وہی شخص نِکال سکتا ہے جِس کی آنکھوں پہ ایک خاص چشمہ لگا ہُوا ہو ، اور میرے پاس وہ چَشمہ موجود ہے ۔ مگر یہاں کِسی کے پاس بھی وہ چَشمہ موجود نہیں “
آوازیں آنا بند ہو گٸیں ۔ وہ دونوں حیرت کے بت بن گٸے ۔ ساکَت سے ہو کر کچھ دیر تک تو وہ کھڑے کے کھڑے رہ گٸے ۔ پھر کوٸی خیال آنے پہ زابیل ایک دم اچھلا اور پھر چلایا ”دوڑو ۔۔ دوڑو ۔۔۔ پکڑو اِن آدمیوں کو ۔ کون ہیں یہ ؟؟“
حسن کا چیخنا بجا تھا ۔ اُس کے پَیر پر اُس نوجوان نے بے خیالی میں اپنا پَیر جو رکھ دیا تھا ۔ وہ تو خیر اس کے چیخنے پہ اُس نے اُٹھا ہی لیا تھا مگر اُس کے لب جو ہِلے تو حسن کو حیرت کی اتھاہ گہراٸیوں میں دھکّا دے گٸے ۔ کیونکہ نوجوان نے کہا تھا ”إِنَّا لِلّهِ وَإِنَّـا إِلَْیہ راجعُون“
اس کا مطلب تھا ، وہ نوجوان مسلمان تھا اور یہی بات حَسَن کے لیے حیرتناک تھی کیونکہ بیریٹن میں مُسلمان بہت کم پاٸے جاتے تھے خصوصًا بیریٹن کے اس شہر میٹن میں تو اِکّا دُکّا مُسلمان بھی کبھی کبھار ہی دکھاٸی دیتے تھے ۔
”تت۔۔۔۔ تُم مسلمان ہو ؟“ حسن کے لب ہلے ۔
”الحَمْد للّٰہ“ نوجوان نے جواب دیا
حَسَن کو لگا ، اُس کے سامنے کوٸی اجنبی نہیں ، اس کا سگا بھاٸی کھڑا ہے ۔ آج صبح والا منظر اُس کے تصوّر کی نظر کے سامنے بچھ گیا ۔ اچانک وہ آگے بڑھا تھا اور اُس نے نوجوان کو اپنے ساتھ لگا لیا تھا ۔ وہ نوجوان بوکھلا گیا ۔ جبکہ حَسَن کے منہ سے ایک سِسکی نکلی اور پھر وہ اچانک دھاڑیں مار کر رونے لگا ۔ اِدھر وہ نوجوان حیرت سے اُس کو دیکھ رہا تھا ۔
خزانے کی تلاش جاری ہے
